Di nabi Adam kubu han meupat
Saboeh riwayat di nanggroe Hindi
Saboeh riwayat nibak nanggroe Syam
Meunan khabaran ulama rawi
‘Oh leuh neupeujeut donya le tuhan
Iblih ngen adam phon-phon neupeuna
Awai na iblih dudoe na adam
Teuma ‘oh leuh nyan na Siti Hawa
Dalam syiruga teutap disinan
Hawa ngen Adam meusuka
Sibak bak kayee timoeh disinan
Karonya tuhan dalam syiruga
Tuhan neuteugah dua ureung nyan
Meuboh kayee nyan han geubi rasa
Iblih di jak le bak nabi adam
Meuboh kayee nyan makanan gata
Ji kheun boh kayee mangat hana ban
Karonya tuhan dalam syiruga
Adam pajoh le meuboh kayee nyan
Tuwoe that Adam larang Rabbana
Adam neu usee laju lee tuhan
Neupeutroen rijang keunoe u donya
Teusuet pakaian bak badan teulhoen
Adam neupeutroen keunoe u donya
