Deungo loen peugah bacut hai taulan
Keu Rasul tuhan di akhe masa
Kadang na salah bak uloen karang
Meu’ah hai rakan ubee na dosa
Na 600 thon leuh nabi Isa
Tan le agama di dalam alam
Ji seumah patong deungon beurhala
Iblis ji puja ka deungon syaithan
Hana malee le dum manusia
Agam ngon dara ka lagee hewan
Han soe turi lee akan po tallah
Lam jahiliyah nibak masa nyan
Han meupue sapue ka ji meupakee
Ku’eh ngen deungki ken wayang-wayang
Minuman arak deungon beurendi
Zina ngen judi rata jeub simpang
Di ureung inoeng sayang bukon lee
Kajeut keu budak barang belian
Kajeut keu barang ureung yang meukat
Toh-toh yang meuhat hajat siagam
Yang dara-dara yang tari-tari
Ji meuniet kupi didalam cawan
Ji meuniet kuweh didalam ceupee
‘Oh watee han lee ji seumpom sinan
Dua blas hari rabiul awal
Lahee janjongan rasul Mustafa
Nibak Aminah nabi laheran
Ngen kheundak tuhan ceudah that rupa
Bak malam senin laher janjongan
Nyan keuh hai rakan malam mulia
Bak teungoh kaom yang jahiliyah
Di Rasulullah neupandang donya
‘Oh ban leuh lahee di Rasulullah
Hana le ayah yang that tercinta
Ayah di nabi saydil Abdullah
Ka kheundak Allah awai neubungka
360 patong lam ka’bah
Nama yang meugah Latta ngen ‘Uzza
Bak watee lahee ya rasulullah
Patong nyan beukah hanco binasa
Hanco dum patong yang kafee seumah
Patong lam ka’bah ngen tanoh rata
Haroem bei-beiwan wangi meuleumpah
Cahya pih beukah peungeuh lagoina
Kanibak thon fil yakni thon gajah
Masa abrahah dijak prang kuta
Ji keuneuk hanco ka’bah baitullah
Rakyat di jajah ji beoh agama
Ticem Ababil batei ji lamboeng
Hanco meukeupong gajah ngen teuntra
Tairan Ababil nama ticem nyan
Dalam Al-Qur’an bak Alam tara
Gajah meuribee jiwoe u gampong
Allah yang tulong han trok ji teuka
Gajah dum mate jip oh lee buroeng
Batei ji lamboeng ateuh keupala
Nabi Muhammad aneuk yang yatim
Lagi miseukin hareuta hana
Yang na na harta ayah neukeubah
Saboh jariyah limoeng boh unta
Tacoek tauladan bak Rasulullah
Nabi yang meugah lagi mulia
Ta pubuet suroeh peujioh teugah
Yang larang Allah bek ta keurija
Nabi geutanyoe nama Muhammad
Yang rayek pangkat ateuh rueng donya
Dum
nabi laen ngen malaikat
Awai Muhammad tamoeng syiruga
Nyoe keuh hai rakan riwayat nabi
Nabi yang ummi di akhe masa
Pu yang neupeugah beu ta ikuti
Yang gobnyan beunci bek ta keurija
Karangan : Keuneubah Ulama, Santri Zawiyatuddarsi
Karangan : Keuneubah Ulama, Santri Zawiyatuddarsi
 |
| Zawiyatuddarsi |
